ഒരൊറ്റ സഫാരിയിൽ ഒരുപാട് വരയാടുകൾ… ഇതാണ് മൂന്നാറിലെ സ്വർഗം

കേരളത്തിലെ മറ്റു കാടുകളിൽ നിന്നൊക്കെ വ്യത്യസ്തമായ ഒരിടം. അപൂർവയിനം മൃഗത്തിന്റെ സാന്നിധ്യം കൊണ്ട് അടയാളപ്പെടുത്തുന്ന സ്ഥലം. അതെ വരയാടുകളുടെ സ്വർഗം ഭൂമിയായ ഇരവികുളം നാഷണൽ പാർക്ക്. വരയാടുകളുടെ സാന്നിധ്യം കൊണ്ട് മാത്രമല്ല ഏറ്റവും പ്രൊഫഷണൽ ആയി വനം വകുപ്പ് കൈകാര്യം ചെയ്യുന്ന ടൂറിസം കേന്ദ്രം കൂടിയാണ് ഇരവികുളം നാഷണൽ പാർക്ക്. അത് പാർക്കിന്റെ എൻട്രൻസ് എത്തുമ്പോൾ തന്നെ നിങ്ങൾക്ക് മനസ്സിലാകും. ആധുനികമായ ബുക്കിംഗ് സംവിധാനത്തിൽ തുടങ്ങുന്നു സവിശേഷത. മികച്ച രീതിയിൽ ഫർണിഷ് ചെയ്ത ലോകോത്തര നിലവാരമുള്ള, വൃത്തിയുള്ള ഒരു ബുക്കിംഗ് പോയിന്റാണ് നിങ്ങളെ ഇവിടെ കാത്തിരിക്കുന്നത്.

200 രൂപയാണ് ഒരാളുടെ ടിക്കറ്റ് ചാർജ്. വിദേശിയാണെങ്കിൽ ഇത് 500 രൂപയാകും. സാധാരണ ക്യാമറയ്ക്ക് 50 രൂപയും വീഡിയോ ക്യാമറയ്ക്ക് 350 രൂപയുമാണ് ചാർജ്. നേരത്തെ ബുക്ക് ചെയ്യുന്നവർക്ക് റിസർവേഷൻ ചാർജ് ആയി 50 രൂപയും വാങ്ങുന്നുണ്ട്.

ടിക്കറ്റ് എടുത്ത് കഴിഞ്ഞാൽ പാർക്കിനുള്ളിലൂടെയുള്ള ഒരു സഫാരിയാണ് ഏറ്റവും വലിയ സവിശേഷത. മുപ്പതോളം ബസ്സുകൾ ആണ് ഇവിടെ സജ്ജീകരിച്ചിരിക്കുന്നത്. ഒന്നിന് പിറകെ ഒന്നായി ആള് തികയുന്ന മുറയ്ക്ക് ബസ്സുകൾ പുറപ്പെടും. സമുദ്രനിരപ്പിൽ നിന്ന് 2000 അടി ഉയരത്തിലേക്ക് കാഴ്ചകൾ കണ്ട് മനോഹരമായ ഒരു യാത്ര.

97 ചതുരശ്ര കിലോമീറ്ററാണ് ഇരവികുളം ദേശീയ ഉദ്യാനത്തിന്റെ വിസ്തീർണ്ണം. ഏറ്റവും ഉയരമുള്ള കൊടുമുടിയായ ആനമുടി സ്ഥിതി ചെയ്യുന്നതും ഈ ഇരവികുളം ദേശീയോദ്യാനത്തിൽ ആണ്. തുടക്കത്തിൽ തേയില തോട്ടത്തിനിടയിലൂടെയാണ് യാത്ര. 15 മിനിറ്റ് മാത്രമാണ് ഈ ബസ്സിലെ യാത്ര. പലയിടത്തും ഇടുങ്ങിയ വഴിയാണ്. ഒടുവിൽ പുൽമേടും ചോലവനവും ഒക്കെയായി വ്യത്യസ്തമായ ഭൂപ്രകൃതി.

വളരെ ചെറിയ ഹെയർപിൻ വളവുകളാണ് ഇവിടെയുള്ളത്. അതുകൊണ്ട് പലയിടത്തും വാഹനം പിന്നോട്ട് എടുത്ത ശേഷമാണ് യാത്ര. രണ്ടു ബസ്സുകൾ ഒരുമിച്ച് കടന്നു പോകാൻ ആകാത്ത അത്രയും വീതി കുറഞ്ഞ ഭാഗങ്ങളുമുണ്ട്. പരിചയസമ്പന്നരായ ഡ്രൈവർമാർ ആയതുകൊണ്ട് തന്നെ ഇവർക്ക് ഇതൊക്കെ നിസ്സാരമായ ജോലി ആണെന്ന് മാത്രം.

ചെങ്കുത്തായ പാറകളാണ് ഇരവികുളത്തിന്റെ പ്രധാന സവിശേഷത. വരയാടുകളുടെ പ്രധാന ആവാസ കേന്ദ്രവും ഇത്തരം പാറകളാണ്. ഇവ പ്രസവിക്കുന്നത് പോലും ഇത്തരം പാറയിടുക്കുകളിലാണ്. ഇത്തരം സ്ഥലങ്ങളിൽ മറ്റു മൃഗങ്ങൾ പെട്ടെന്ന് എത്തി ആക്രമിക്കില്ല എന്നതാണ് അതിനൊരു പ്രധാന കാരണം. മനുഷ്യരുമായി അകലം ഇല്ലാതെ ചേർന്നു നടക്കാനും വരയാടുകൾക്ക് മടിയില്ല. മനുഷ്യസാന്നിധ്യമുണ്ടെങ്കിൽ മറ്റു മൃഗങ്ങൾ ആക്രമിക്കില്ല എന്നതും ഇതിനൊരു കാരണമായി പറയുന്നുണ്

മുന്നാറിലെ ഏറ്റവും തണുപ്പുള്ള പ്രദേശങ്ങളിൽ ഒന്നാണ് ഇരവികുളം നാഷണൽ പാർക്ക്. പാറക്കെട്ട് മാത്രം അല്ല ഇവിടുത്തെ തണുപ്പും വരയാടുകൾ ഇവിടം ആവാസവ്യവസ്ഥയായി തെരഞ്ഞെടുക്കാൻ കാരണമാണ്.

മുകളിലേക്ക് എത്തും മുൻപ് തന്നെ വരയാടുകളെ കാണാൻ തുടങ്ങും. പാറകളുടെ അനായാസമാണ് ഇവരുടെ യാത്ര. കൃത്യം 15 മിനിറ്റ് കൊണ്ട് നമ്മൾ ഇരവികുളത്തിന്റെ ടോപ് സ്റ്റേഷനിൽ വണ്ടി എത്തി.ഇവിടെ ബസ്സിറങ്ങി നടന്നുവേണം ഇനി മുകളിലേക്ക് കയറാൻ. തിരികെ പോകേണ്ടവർക്കായുള്ള ബസ്സുകൾ ഇവിടെ വരിയായി കാത്തുനിൽക്കുന്നത് കാണാം. പോകുന്ന ബസ്സിൽ തന്നെ മടങ്ങി പോകണം എന്നില്ല. കിട്ടുന്ന ബസ്സിൽ നിങ്ങൾക്ക് യാത്ര ചെയ്യാം.

ബസ്സിറങ്ങി മുകളിലേക്ക് കയറി ഒരു വളവു കഴിഞ്ഞപ്പോൾ മുന്നിലേക്ക് വരയാടിൻ കൂട്ടമെത്തി. മനുഷ്യനെ അവർക്ക് യാതൊരു ഭയവുമില്ല എന്ന് തുടക്കത്തിൽ തന്നെ മനസിലായി.ആളുകൾ ഇരിക്കുന്ന സ്ഥലത്തേക്ക് യാതൊരു പേടിയും ഇല്ലാതെ അവർ എത്തി. മനുഷ്യനും ഇവരെ പേടിക്കേണ്ടതില്ല. അത്ര അടുത്തു കൂടി പോകുമ്പോൾ പോലും ഇവർ മനുഷ്യരെ ഉപദ്രവിച്ച് കണ്ടില്ല.

വംശനാശം ഭീഷണി നേരിടുന്ന വരയാടുകൾ വന്യജീവി സംരക്ഷണ നിയമത്തിൽ ഒന്നാം പട്ടികയിൽ ഉൾപ്പെടുന്നവരാണ്. ചെങ്കുത്തായ പാറയിൽ എല്ലാം അനായാസം സഞ്ചരിക്കാം എന്നതാണ് ഇവരുടെ പ്രധാനപ്പെട്ട സവിശേഷത. തമിഴ്നാടിന്റെ സംസ്ഥാന മൃഗം കൂടിയാണ് നീലഗിരി താർ എന്നറിയപ്പെടുന്ന വരയാടുകൾ.

പശ്ചിമഘട്ടത്തിൽ ഇപ്പോൾ ഏതാണ്ട് 2500 ഓളം വരയാടുകൾ ഉണ്ട് എന്നാണ് ഏകദേശ കണക്ക്. ഇരവികുളം ദേശീയോദ്യാനത്തിലെ രാജമല പന്തുമല, ചിന്ന പന്ത് മല,ഭാഗങ്ങളിൽ ഇവയെ കൂടുതലായി കാണാം. വംശം നാശ ഭീഷണിയിൽ കഴിയുന്ന വരയാടുകൾ ഐയുസിഎന്റെ റെഡ് ഡാറ്റ ലിസ്റ്റിലാണ് ഉള്ളത്.

തമിഴ് ഭാഷയിൽ നിന്നാണ് വരയാടുകൾക്ക്‌ ഈ പേരു ലഭിച്ചത്‌ എന്നാണ് വിലയിരുത്തൽ. തമിഴിൽ വരൈ എന്നാൽ പാറ എന്നാണ് അർത്ഥം. പാറ ആവാസവ്യവസ്ഥയാക്കിയ ആട് എന്ന നിലയിൽ ആണ് ഇവർ വരയാട് ആയത്.

മൂന്നാറിൽ നിന്നും മറയൂർ റൂട്ടിൽ 15 കിലോമീറ്റർ ഓളം സഞ്ചരിച്ചാൽ ഇരവികുളം ദേശീയ പാർക്കിൽ എത്താം. വരുന്ന വഴിയിൽ തന്നെ ഉദ്യാനത്തിന്റെ കവാടം കാണാം. ഇവിടെയെത്തുന്നതിനു മുൻപ് ഓൺലൈനായി തന്നെ ടിക്കറ്റ് എടുത്ത ശേഷം വന്നാൽ കാര്യങ്ങൾ എളുപ്പം ആയി. ടിക്കറ്റിനായി ഏറെനേരം കാത്തിരിക്കേണ്ടി വരില്ല.

കുറിഞ്ഞി ഗാർഡൻ ആണ് ഇരവികുളം ദേശീയ ഉദ്യാനത്തിലെ ഒരു പ്രധാന കാഴ്ച. 12 വർഷത്തിലൊരിക്കൽ പൂക്കുന്ന നീലക്കുറിഞ്ഞികൾ ഇവിടെയുണ്ട്. പാർക്ക് സന്ദർശിക്കുന്നവർക്ക് എല്ലാ സമയത്തും നീലക്കുറിഞ്ഞിയുടെ ചെടികൾ കാണാം. ഇതിനെക്കുറിച്ചുള്ള വിശദമായ വിവരങ്ങളും പാർക്കിൽ എഴുതിവെച്ചിട്ടുണ്ട്. കുറിഞ്ഞി പൂക്കുന്ന കാലമായാൽ രാജമല കൂടുതൽ മനോഹരമാകും.

മനുഷ്യനുമായി ചേർന്നു നിൽക്കുന്നത് കൊണ്ട് തന്നെ ഒരല്പം സ്വാതന്ത്ര്യത്തോടെയാണ് ഈ മൃഗത്തോട് ആളുകൾ പെരുമാറി കാണുന്നത്. ഫോട്ടോകൾ എടുക്കുന്നതിനും മറ്റും ഇവയോട് ചേർന്ന് നിൽക്കുന്നത് ഇരവികുളത്ത് കാണാം. വളർത്തു മൃഗത്തോട് എന്ന നിലയിൽ ഒരല്പം വാത്സല്യം ഒക്കെ കാണിക്കുന്ന മനുഷ്യരും ഉണ്ട്. വരയാടുകൾ ഒരു വന്യ ജീവിയാണെന്ന് പലപ്പോഴും പല മനുഷ്യരും മറന്നുപോകുന്നു. വന്യമൃഗങ്ങളോട് ഒരു അകലം പാലിക്കുന്നതാണ് അവർക്കും മനുഷ്യർക്കും നല്ലത്. സ്വമേധയാ ഭക്ഷണം തേടി കഴിക്കുന്ന വന്യമൃഗങ്ങൾക്ക് മനുഷ്യർ ഭക്ഷണം നൽകുന്നതും അത്ര നല്ല കാര്യമല്ല.

ഫെബ്രുവരി മാർച്ച് മാസങ്ങളാണ് വരയാടുകളുടെ പ്രജനനകാലം. ഈ സമയം ഇരവികുളം നാഷണൽ പാർക്ക് പൂർണമായും അടച്ചിടും. പിന്നീട് ഏപ്രിൽ മുതലാണ് പൊതുജനങ്ങൾക്ക് പ്രവേശനം ഉണ്ടാകുക. ഏപ്രിലിൽ പാർക്ക് തുറക്കുന്ന സമയത്ത് എത്തിയാൽ പലപ്പോഴും വരയാടിൻ കുഞ്ഞുങ്ങളെ അടക്കം നിങ്ങൾക്ക് കാണാൻ സാധിക്കും. ഓരോ വർഷവും പുതുതായി ജനിക്കുന്ന കുഞ്ഞുങ്ങളുടെയും നിലവിലുള്ള വരയാടുകളുടെയും കണക്ക് വനം വകുപ്പ് എടുക്കാറുണ്ട്. അതിർത്തി പ്രദേശമായതിനാൽ തന്നെ തമിഴ്നാടുമായി ചേർന്നുള്ള സർവ്വേകളും ഈ മേഖലയിൽ നടക്കുന്നു.

ഇരവികുളം നാഷണൽ പാർക്ക് സ്ഥാപിച്ചിട്ട് ഇത് അൻപതാം വർഷമാണ്. ഇത്തവണ അതുകൊണ്ടുതന്നെ തമിഴ് നാടുമായി സഹകരിച്ചുകൊണ്ട് പ്രത്യേക സർവേയാണ് ഇത്തവണ നടത്തിയത്. വരയാടുകളുടെ സംരക്ഷണം ഉറപ്പുവരുത്തുന്നതിന് വേണ്ടിയാണ് ഓരോ വർഷവും ഇവയുടെ എണ്ണം തിട്ടപ്പെടുത്തുന്നത്. വിദഗ്ധരും ഉൾപ്പെടെ നേരിട്ട് ഇറങ്ങി കണക്കെടുക്കുന്നത് കൂടാതെ ക്യാമറ ട്രാപ്പുകൾ ഉൾപ്പെടെ സ്ഥാപിച്ചാണ് ഇത്തവണത്തെ കണക്കെടുപ്പ്.

ബസുകൾ കൂടാതെ ബഗ്ഗി കാറുകൾ വഴിയും നിങ്ങൾക്ക് ഇരവികുളത്ത് സഫാരി നടത്താം. 7500 രൂപയാണ് ഇതിന്റെ ചാർജ്. ബസ് എത്തുന്നതും കഴിഞ്ഞ് മനുഷ്യർക്ക് പ്രവേശനമുള്ള സ്ഥലം വരെ യാത്ര ചെയ്യാം എന്നതാണ് ഈ സഫാരിയുടെ പ്രത്യേകത. താഴെ ബുക്കിംഗ് കൗണ്ടറിൽ നിന്നും തന്നെ നിങ്ങൾക്ക് ഇത് ലഭിക്കും.

ഇരവികുളത്ത് എത്തിയാൽ എപ്പോഴും യഥേഷ്ടം വരയാടുകളെ കാണാം എന്ന് നിങ്ങൾ കരുതരുത്. പല സഞ്ചാരികളും നിരവധി തവണ ഒറ്റ വരയാടുകളെ പോലും കാണാതെ മടങ്ങേണ്ടി വന്നിട്ടുണ്ട്. സാധാരണക്കാടുകളിലെ പോലെ വന്യമൃഗങ്ങളെ കാണുക എന്നത് ഇവിടെയും ഒരു ഭാഗ്യമാണ്. ഒരൊറ്റ സഫാരിയിൽ തന്നെ ഒരുപാട് വരയാടുകളെ കാണാൻ കഴിഞ്ഞു എന്നതാണ് ഈ യാത്രയുടെ സന്തോഷം.