കോട്ടയം ജില്ലയുടെ കിഴക്കൻ അതിർത്തിയിലാണ് പ്രസിദ്ധമായ ഇല്ലിക്കൽ കല്ല് സ്ഥിതി ചെയ്യുന്നത്. സമുദ്രനിരപ്പിൽ നിന്ന് 4000 അടി ഉയരത്തിൽ പ്രകൃതി ഒരുക്കിയ മനോഹരമായ കാഴ്ചയാണ് ഇല്ലിക്കൽ കല്ലിന്റെ പ്രധാനപ്പെട്ട പ്രത്യേകത. മനോഹരമായ പ്രകൃതിയിൽ തലപ്പാവണിഞ്ഞു നിൽക്കുന്ന കൂനൻ കല്ലും, കുടക്കല്ലും. അതിനടിയിലെ നരകപ്പാലം. മധ്യ കേരളത്തിലെ സന്ദർശകർക്ക് വളരെ എളുപ്പത്തിൽ എത്താവുന്ന മനോഹരമായ ടൂറിസം ഡെസ്റ്റിനേഷൻ.
ഇല്ലിക്കൽ കല്ലിലേക്ക് എങ്ങനെ എത്താം? പല വഴികൾ ഇവിടെ കൊണ്ട് എന്നുള്ളതാണ് ഒരു പ്രത്യേകത. ഈരാറ്റുപേട്ടയിൽ നിന്ന് മൂന്നിലവ് മങ്കൊമ്പ് പഴുക്കാക്കാനം വഴി നിങ്ങൾക്ക് ഇല്ലിക്കൽ കല്ലിൽ എത്താൻ സാധിക്കും. ഈരാറ്റുപേട്ടയിൽ നിന്ന് വാഗമൺ റൂട്ടിൽ സഞ്ചരിച്ച് തീക്കോയിൽ നിന്നും ഇടത്തേക്ക് തിരിഞ്ഞ് നിങ്ങൾക്ക് ഇല്ലിക്കൽ കല്ലിൽ എത്താം. ഈരാറ്റുപേട്ടയിൽ നിന്ന് ഏതാണ്ട് 18 കിലോമീറ്റർ ദൂരമുണ്ട്. കാഞ്ഞിരം കവലയിൽ നിന്ന് മേലുകാവ് മേച്ചാൽ നെല്ലാപ്പാറ വഴിയും ഇല്ലിക്കൽ കല്ലിൽ നിങ്ങൾക്ക് എത്താം.
ഇവിടേക്ക് എത്തുന്നതിന് ഗൂഗിൾ മാപ്പ് നിങ്ങളെ സഹായിക്കും.
ഇല്ലിക്കൽ കല്ലിലേക്ക് പോകുന്നവർ കാഴ്ചകൾ സമ്മാനിക്കുന്ന രണ്ടു പോയിന്റുകൾ ഉണ്ട്. ഒന്ന് ഇല്ലിക്കൽ കല്ലിന്റെ പിൻഭാഗമാണ്. ഇവിടെയെത്തിയശേഷം മല കയറി ട്രക്കിംഗ് നടത്താനുള്ള മനോഹരമായ അവസരം നിങ്ങൾക്കുണ്ട്. ആദ്യത്തെ കാഴ്ചയിൽ കല്ലിന്റെ അടുത്ത് എത്താമെങ്കിലും ട്രക്കിംഗ് ആണ് പ്രധാന സവിശേഷത. കല്ല് മറ്റൊരു വ്യൂ പോയിന്റിൽ നിന്നുകൊണ്ട് കാണണമെങ്കിൽ രണ്ടാമത്തെ വഴിയാണ് നല്ലത്. ഇല്ലിക്കൽ കല്ലിന്റെ താഴെ വരെ നിങ്ങളുടെ വാഹനം പാർക്ക് ചെയ്യാം. അവിടെനിന്നും ഒരാൾക്ക് 59 രൂപ കൊടുത്താൽ എൻട്രൻസ് ഫീസും ജീപ്പിന്റെ പൈസയുമായി കണക്കാക്കി നിങ്ങൾക്ക് ഇല്ലിക്കൽ കല്ലിലേക്ക് യാത്ര ചെയ്യാം.
ഇല്ലിക്കൽ കല്ലിന്റെ മുകളിലേക്കുള്ള യാത്രാ മനോഹരമാണ്. ഏതാണ്ട് ഒരു കിലോമീറ്റർ ആണ് ജീപ്പിൽ ഇതുവഴി സഞ്ചരിച്ച് മുകളിൽ എത്തേണ്ടത്. ഈ ഒരു കിലോമീറ്റർ നടന്നു കയറുന്നതിനും നിങ്ങൾക്ക് സൗകര്യമുണ്ട്. അങ്ങനെയെങ്കിൽ ജീപ്പിനുള്ള പൈസ നിങ്ങൾക്ക് കൊടുക്കേണ്ടി വരില്ല.
ഇല്ലിക്കൽ കല്ലിന്റെ മുകളിൽ എത്തിയാൽ നിങ്ങൾക്ക് കല്ലിന്റെ പശ്ചാത്തലത്തിൽ ചിത്രങ്ങൾ എടുക്കുന്നതിനും റീല് ചിത്രീകരിക്കുന്നതിനും അവസരമുണ്ട്. ഡിറ്റിപിസി ആണ് ഇവിടെ ടൂറിസം സൗകര്യങ്ങൾ ഒരുക്കിയിരിക്കുന്നത്. പാർക്കിംഗ് ഏരിയയിൽ ശൗചാലയങ്ങൾ അടക്കമുള്ള സൗകര്യങ്ങളും ഇവിടെയുണ്ട്. പ്രകൃതിക്ഷോഭം ഉള്ള സമയങ്ങളിൽ ഇവിടെക്ക് ഉള്ള പ്രവേശനം നിരോധിക്കാറുണ്ട്. അതുകൊണ്ടുതന്നെ ഇല്ലിക്കൽ കല്ലിലേക്ക് യാത്ര ചെയ്യുന്ന സമയത്ത് സാഹചര്യങ്ങൾ കൃത്യമായി ഉറപ്പുവരുത്തണം.
അതിരാവിലെയും വൈകുന്നേരവും കോടമഞ്ഞ് കാര്യമായി നിങ്ങൾക്ക് ഒരു അനുഭൂതിയായി എത്തും. ഈ സമയങ്ങളിൽ ഇവിടെ എത്തുന്നത് മനോഹരമായ ഒരു അനുഭവമാണ്. കോടമഞ്ഞുള്ള സമയം ദൂരക്കാഴ്ചകൾ കാണില്ല എന്ന് മാത്രം. ഇല്ലിക്കൽ കല്ലിന് മുകളിൽ നിന്നാൽ തൊട്ടടുത്തുള്ള ഒരുപാട് നഗരങ്ങൾ നിങ്ങൾക്ക് കാണാം. വാഗമൺ തൊടുപുഴ റോഡിലെ പുള്ളിക്കാനം എസ് വളവിന്റെ കാഴ്ചയും ഇവിടെ നിന്ന് കാണാം. ഒരു കാര്യം ഉറപ്പായും പറയാം. നിങ്ങൾ ഒരിക്കലെങ്കിലും പോകേണ്ട സ്ഥലം തന്നെയാണ് ഇല്ലിക്കൽ കല്ല്.
