രാജ്യത്തെ ട്രെയിൻ ഗതാഗത സംവിധാനത്തിന്റെ തന്നെ മുഖം മാറ്റിയ വന്ദേ ഭാരത് അതിന്റെ വളർച്ചയുടെ അടുത്ത ഘട്ടത്തിലേക്ക് കടക്കുകയാണ്. വന്ദേ ഭാരത് ട്രെയിനുകൾ സെപ്റ്റംബറിൽ ഇറങ്ങുമെന്ന് റെയിൽവേ മന്ത്രി അശ്വിനി വൈഷ്ണവ് പ്രഖ്യാപിച്ചു. ഗുജറാത്തിലെ ഭാവ് നഗറിൽ ഞായറാഴ്ച നടന്ന ഒരു പരിപാടിക്കിടെയാണ് മന്ത്രിയുടെ പ്രഖ്യാപനം.
ഏറ്റവും ആധുനികമായ സാങ്കേതിക സംവിധാനത്തോടെയാണ് വന്ദേ ഭാരത് സ്ലീപ്പർ കളം പിടിക്കാൻ ഒരുങ്ങുന്നത്. ഐസിഎഫ് സാങ്കേതിക വിദ്യയിൽ ആണ് പുതിയ ട്രെയിൻ രൂപകല്പന ചെയ്തിരിക്കുന്നത്. വന്ദേ ഭാരത് ട്രെയിനുകൾ നിർമ്മിക്കുന്ന ഭാരത് എർത്ത് മൂവേഴ്സ് ലിമിറ്റഡ് ആണ് വന്ദേ ഭാരത് സ്ലീപ്പറുകൾ നിർമ്മിച്ചിരിക്കുന്നത്.
റെയിൽവേ യാത്രയുടെ ഗതി തന്നെ മാറ്റുന്നതാണ് വന്ദേ ഭാരത് സ്ലീപ്പർ ട്രെയിനുകൾ എന്ന് കേന്ദ്ര മന്ത്രി അശ്വനി വൈഷ്ണവ് ചൂണ്ടിക്കാട്ടി. നിലവിലുള്ള വന്ദേ ഭാരത് ട്രെയിനുകൾ പകൽ യാത്രയ്ക്കാണ് ഉപയോഗിച്ചിരുന്നത്. സ്ലീപ്പർ ട്രെയിനുകൾ എത്തുന്നതോടെ റെയിൽ യാത്രക്കാരെ സംബന്ധിച്ച് ആധുനിക സൗകര്യങ്ങളോടെ രാത്രി യാത്ര സാധ്യമാകും എന്നതാണ് പ്രത്യേകത.
വന്ദേഭാരത് സ്ലീപ്പർ ട്രെയിൻ വരുന്നതോടെ കേരളവും വലിയ പ്രതീക്ഷയിലാണ്. ഇന്ത്യയിൽ പുറത്തിറക്കിയ വന്ദേ ഭാരത ട്രെയിനുകളിൽ കേരളത്തിലേത് മികച്ച രീതിയിലാണ് സർവീസുകൾ നടത്തുന്നത്. ഏതാണ്ട് എല്ലാ സർവീസുകളും യാത്രക്കാരെ കൊണ്ട് നിറഞ്ഞ് പോകുന്നു എന്നത് ട്രെയിനിന്റെ സ്വീകാര്യത കൂടിയാണ് ചൂണ്ടിക്കാട്ടുന്നത്. അതുകൊണ്ടുതന്നെ ആദ്യ സ്ലീപ്പർ ട്രെയിനുകൾ തന്നെ കേരളത്തിന് ലഭിക്കുമെന്ന പ്രതീക്ഷയുമുണ്ട്. എന്നാൽ നിലവിൽ ഏത് റൂട്ടിലാണ് ആദ്യ സർവീസ് എന്നത് കേന്ദ്രസർക്കാർ വ്യക്തമാക്കിയിട്ടില്ല. ആദ്യ ട്രെയിൻ തന്നെ കിട്ടിയില്ല എങ്കിലും അധികം വൈകാതെ കേരളത്തിനും വന്ദേ ഭാരത് സ്ലീപ്പർ ലഭിക്കും എന്നാണ് സൂചന.
കേരളത്തിൽ നിന്നുള്ള ഏറ്റവും തിരക്കേറിയ റൂട്ട് ആയ ബാംഗ്ലൂർ – തിരുവനന്തപുരം, ചെന്നൈ തിരുവനന്തപുരം തുടങ്ങിയ റൂട്ടുകൾ ആദ്യ പരിഗണനയിലുണ്ട് എന്നാണ് സൂചന. ദീർഘദൂര സർവീസുകളും വൈകാതെ ഉണ്ടായേക്കും.
