സ്വർഗ്ഗത്തെക്കുറിച്ച് നിങ്ങൾ നിരവധിയായി കേട്ടിട്ടുണ്ട്. പക്ഷേ സ്വർഗ്ഗത്തിലെ പഴത്തെക്കുറിച്ച് കേട്ടിട്ടുണ്ടോ. എന്നാൽ അങ്ങനെയൊന്നുണ്ട്. പക്ഷേ അത് അന്വേഷിച്ച് അങ്ങ് ദൂരെയെങ്ങും പോകണ്ട. കോട്ടയം ഏറ്റുമാനൂർ കാട്ടാത്തി മാലിയേൽ രതീഷ് രത്നാകരന്റെ വീട് വരെ എത്തിയാൽ മതി. വീടിന്റെ ടെറസിന് മുകളിൽ സ്വർഗ്ഗപ്പഴം നിറഞ്ഞു നിൽക്കുകയാണ്.
ഗാഗ് ഫ്രൂട്ട് ആണ് സ്വർഗ്ഗ പഴം എന്ന പേരിൽ കേരളത്തിൽ അറിയപ്പെടുന്നത്. സ്വർഗ്ഗത്തിലെ കനി എന്നതടക്കം പല വിശേഷണങ്ങളും ഗാഗ് ന് ഉണ്ട്. ഇതിന്റെ ഗുണങ്ങളാണ് സ്വർഗ്ഗത്തോളം വലിയൊരു വിശേഷണത്തിലേക്ക് ഈ പഴത്തെ കൊണ്ട് ചെന്നെത്തിച്ചത്. പേരുപോലെതന്നെ സ്വർഗ്ഗത്തോളം ഭംഗിയുണ്ട് ഗാഗ് ഫ്രൂട്ടിന്. നല്ല പഴുത്ത പഴം ചുവന്ന് തുടുത്തിരിക്കും. ചിത്രങ്ങളിൽ കണ്ടാൽ ഇത് പ്ലാസ്റ്റിക് കൊണ്ട് ഉണ്ടാക്കിയതാണോ എന്നു വരെ തോന്നും. അത്രത്തോളം മനോഹരമാണ് ഇതിന്റെ പുറംതോട്.
സ്വർഗ്ഗത്തിലെ പഴം എന്ന് പേരുണ്ടെങ്കിലും വിയറ്റ്നാമിൽ നിന്നാണ് ഇവന്റെ വരവ്. ഔഷധഗുണങ്ങൾ തന്നെയാണ് ഗാഗിനെ ശ്രദ്ധേയമാക്കുന്നത്. ജീവിതശൈലി രോഗങ്ങളെ അകറ്റി നിർത്താൻ ഈ പഴത്തിന് സിദ്ധിയുണ്ട് എന്നാണ് ചൂണ്ടിക്കാണിക്കപ്പെടുന്നത്. ശരീരത്തിന് വേണ്ടത്ര പോഷക ഗുണങ്ങളും ഈ പഴം നൽകുന്നു. പഴം മാത്രമല്ല ഇതിന്റെ ഇലകളും പഴുക്കാത്ത കായയും എല്ലാം കറി വെക്കാനും ഉപയോഗിക്കാം.
ജ്യൂസ് അടിച്ച് ആണ് ഇവ പ്രധാനമായും ഉപയോഗിക്കുന്നത്. ഒരു പഴത്തിന് 700 മുതൽ 750 വരെ ഗ്രാം തൂക്കമുണ്ട്. പഴം രണ്ടായി മുറിച്ച ശേഷം അതിനുള്ളിലെ മാംസളമായ ഭാഗമാണ് ജ്യൂസിനായി ഉപയോഗിക്കുന്നത്. ഒരു പഴത്തിൽ നിന്ന് തന്നെ 30 ഓളം ജ്യൂസുകൾ എങ്കിലും ഉണ്ടാക്കാം എന്നതും ഇതിന്റെ പ്രത്യേകതയാണ്. പഴം മുറിച്ച് ശേഷം ബാക്കി ഭാഗം ഫ്രിഡ്ജിൽ സൂക്ഷിച്ചും പിന്നീട് ഉപയോഗിക്കാം.
കേരളത്തിൽ നിരവധി സ്ഥലങ്ങളിൽ ഇപ്പോൾ ഗാഗ് കൃഷി നടക്കുന്നുണ്ട്. പഴത്തിനുള്ളിൽ നിന്ന് ലഭിക്കുന്ന കുരു നട്ട് ചെടിയായി വളർത്തിയെടുക്കാം. ഒന്നു മുതൽ രണ്ടുമാസം വരെ കാലയളവിലാണ് കുരു മുളച്ചു കിട്ടുന്നത്. പടർന്നു വന്നാൽ പന്തൽ ഇട്ടു കൊടുക്കണം. ഇല്ലെങ്കിൽ മരങ്ങൾ മുകളിലേക്ക് പടരാൻ സാധ്യതയുണ്ട്. അങ്ങനെ വന്നാൽ കായ ശേഖരിക്കുക എളുപ്പമല്ല. ഏതായാലും ഈ അത്ഭുതപഴത്തിൽ നിന്ന് മൂല്യ വർദ്ധന ഉൽപ്പന്നങ്ങൾ ഉണ്ടാക്കാനുള്ള ആലോചനയിലാണ് രതീഷ്.